Velkomin
Sjálfstæðisflokkurinn á Akureyri
Fréttir og greinar
Íslendingar hafa um áratugaskeið haldið hátíðlegan sjómannadag til að heiðra sjómennina okkar, þessar hetjur hafsins sem hafa staðið vaktina á ólgusjó í blíðu og stríðu. Þessi dagur er ekki aðeins tækifæri til að fagna með fjölskyldum og vinum, heldur fyrst og fremst til að þakka sjómönnum fyrir ómetanleg störf í þágu þjóðarinnar. Á hverjum einasta degi ársins leggja þeir líf sitt og limi í sölurnar til að tryggja okkur hinum afkomu og öryggi; þeir sækja björg í bú yfir úfinn sæ, skapa verðmæti úr auðlindinni og skila þjóðarbúinu gjaldeyristekjum sem undirbyggja lífskjör okkar allra. Íslendingar eiga langa sögu sjómennsku og sjávartengdrar verðmætasköpunar. Hún er ekki bara hluti af fortíðinni heldur líka af nútíðinni og framtíðinni. Því án öflugrar sjómennsku og öflugs sjávarútvegs værum við allt önnur þjóð. Við Íslendingar þurfum á svona dögum að leiða hugann að hlutskipti sjómanna og átta okkur á að sjálfsögð gæði daglegs lífs; ferskur fiskur á disknum, atvinnutækifæri um land allt, góðar tekjur þjóðarbúsins, koma ekki af sjálfu sér. Þau verða til m.a. fyrir dugnað og þrautseigju sjómannastéttarinnar, sem á skilið virðingu okkar og hlýhug. Þó að margt hafi breyst í sjávarútvegi hefur eitt staðið í stað: mikilvægi greinarinnar fyrir efnahag Íslands og samfélagið í heild. Sjómenn og sjávarútvegur skapa ekki bara störf og útflutningstekjur – þau skapa líka festu í byggðum og tengingu við náttúruauðlindir landsins. Það skiptir máli fyrir heila þjóð. Já, sjómenn eru lykilfólk í íslensku atvinnulífi. Þeir veiða af ábyrgð og þekkingu og með þeim hætti sem tryggir að við getum skilað auðlindinni áfram til næstu kynslóða. Sjávarútvegurinn hefur á síðustu áratugum gengið í gegnum gríðarlega umbreytingu – frá erfiðisvinnu í handafli yfir í háþróaða tækni, þekkingu og sjálfbærni. Það er árangur sem við getum verið stolt af. Á sama tíma má ekki gleyma því að starfið sjálft – það að fara á sjó – krefst enn mikils. Það er dýrmætt að þjóðin taki frá dag á hverju ári til að staldra við og þakka sjómönnum fyrir þeirra framlag. Þess vegna ber okkur skylda til að standa vörð um góð starfsskilyrði sjómanna, öflugt samkeppnishæft umhverfi í sjávarútvegi og að halda áfram að nýta auðlindina á ábyrgðarfullan hátt. Við verðum að tryggja að íslenskur sjávarútvegur verði áfram í fremstu röð, ekki bara í afkomu heldur líka í nýsköpun, sjálfbærni og virðingu fyrir mannauðnum sem knýr hann áfram. Sem formaður Sjálfstæðisflokksins vil ég nota tækifærið og óska ykkur öllum, fjölskyldum ykkar og landsmönnum til hamingju með daginn. Takk fyrir störfin, framtakið og verðmætin. Takk fyrir að halda áfram að gera Ísland að sterkari, sjálfbærari og öflugri þjóð. Til hamingju með sjómannadaginn. Guðrún Hafsteinsdóttir formaður Sjálfstæðisflokksins
Það er lítilmannlegt að kenna öðrum um eigin ráðaleysi eins og dómsmálaráðherra gerði um sl. helgi og fékk bágt fyrir í þingsal í byrjun vikunnar. Stór mál ráðherra nutu ekki meiri hljómgrunns en svo innan eigin ríkisstjórnar að hunda- og kattahald og nafngift stofnunar voru tekin fram yfir mikilvæg útlendingamál og landamæravörslu. Þetta risti eðlilega djúpt hjá ráðherra, en í staðinn fyrir að taka harmakveinið út á ríkisstjórnarfundi sakaði hún stjórnarandstöðuna um að tefja fyrir málunum í útvarpsviðtali. Þær ásakanir áttu vitaskuld ekki við nokkur rök að styðjast enda bauð minnihlutinn hinni sanngjörnu og réttlátu ríkisstjórn Íslands að færa málið framar svo hægt væri að koma þeim í gegn og þannig treysta stoðir Íslands í útlendingamálum. Ráðherra lét nú vera að segja takk heldur hélt áfram með skæting í ræðupúlti Alþingis, þrátt fyrir að hafa fengið meiri aðstoð frá fólkinu sem hún sakar um „tafaleiki“ en sinni eigin ríkisstjórn. En gott og vel. Í yfirlætisfullum ræðum sínum, þegar Þorbjörg Sigríður reyndi með veikum mætti að svara stjórnarandstöðunni, hélt ráðherrann áfram innantómum ásökunum um að stjórnarandstaðan hefði aðeins eitt erindi á Alþingi og það væri að gæta sérhagsmuna. Fleira hefði hún ekki upp á að bjóða, svona fyrir utan auðvitað að hjálpa ráðherranum að marka sín spor í nýja starfinu. Erindi Sjálfstæðisflokksins á Alþingi er mjög skýrt. Það er að berjast gegn skattastjórninni sem hefur falið tilgang sinn með frasafroðu og fallegum orðum. Staðan er einföld. Skattastjórnin er með í pípunum að hækka skatta á allt að 95.000 manns. Veiðigjöld, aukin skattlagning ferðaþjónustunnar, afnám samsköttunar hjóna og lokun á svokölluðu EHF-gati. Skattahækkanir á skattahækkanir ofan. Það hefur verið erindi Sjálfstæðisflokksins í tæpa öld að gæta hagsmuna borgaranna í landinu og stuðla að verðmætasköpun fyrir framþróun lands og þjóðar. Því munum við halda áfram nú sem endranær. Jens Garðar Helgason varaformaður Sjálfstæðisflokksins
Bæjarmálafundur Sjálfstæðisflokksins á Akureyri verður haldinn í Geislagötu 5 mánudaginn 2. júní kl. 17:30 í Geislagötu 5, 2. hæð. Rætt um stöðuna í bæjarmálunum og það helsta sem er að gerast í pólitíkinni í bænum. Þórhallur Jónsson fer yfir það helsta sem er að gerast í skipulagsmálum hjá Akureyrarbæ. Fundarstjóri: Þórhallur Jónsson, varabæjarfulltrúi og varaformaður skipulagsráðs Akureyrarbæjar Allir velkomnir - heitt á könnunni.
Það er margt forvitnilegt við viðtalið sem Þorbjörg Sigríður Gunnlaugsdóttir dómsmálaráðherra gaf á Sprengisandi í gær. Þar kynnti hún aðgerðir á borð við afturköllun verndar fyrir sakamenn, aukið landamæraeftirlit, stofnun brottfarar- og móttökustöðva og samninga við flugfélög um afhendingu farþegalista. Allt undir merkjum „nýrrar stefnu“ og „nýrrar nálgunar“. En vandinn er sá: Þetta er ekki nýtt. Ekkert af þessu er nýtt. Þessi mál voru þegar í farvegi í tíð síðustu ríkisstjórnar. Frumvarp um afturköllun verndar fyrir sakamenn var á þingmálaskrá minni. Það sama má segja um að koma á fót brottfararúrræði og greiningarmiðstöð. Undirbúningur að samningum við flugfélög hófst í ráðuneytinu undir stjórn Sjálfstæðisflokksins. Landamærastefnan sem nú er notuð sem grunnur að aðgerðum ráðherrans var samþykkt í ríkisstjórn í nóvember 2024 og kynnt opinberlega í samvinnu við ríkislögreglustjóra. Þá stendur ekki steinn yfir steini í pistli sem ráðherrann birti á Vísi fyrr í dag. Þar heldur ráðherra því fram að Sjálfstæðisflokkurinn ókyrrist þegar umbætur í landamæramálum eru ræddar. En veit ráðherra ekki hver setti þessa stefnu? Veit hún ekki að það var ríkisstjórn undir forystu Sjálfstæðisflokksins sem lagði grunninn að öllum þeim úrræðum sem hún nú eignar sér? Veit hún ekki að landamærastefnan sem hún byggir á, og talar um sem byltingu, var unnin á mínum tíma í ráðuneytinu, í nánu samstarfi við lögregluembættin og ríkislögreglustjóra? Það má einnig minna ráðherrann á þegar hún segir stefnu- og aðgerðaleysi hafa einkennt fyrri ríkisstjórn að þann 20. febrúar 2024 samþykkti þáverandi ríkisstjórnin heildarsýn í málefnum útlendinga og hælisleitenda með 20 aðgerðum til úrbóta. Meðal annars að koma upp greiningarmiðstöð á landamærunum sem og lokuðu brottfararúrræði. Það er ekkert athugavert við að taka upp góðar hugmyndir. Gott er gott, sama hvaðan það kemur. En þegar ráðherra snýr út úr staðreyndum og talar eins og pólitískt minnisleysi sé dyggð, þá verður að bregðast við. Það er ekki stjórnmálaleg nýsköpun að taka stefnu annarra, endurpakka henni og selja hana sem sína eigin. Það kallast einfaldlega að skreyta sig með stolnum fjöðrum. Í stjórnmálum má skipta um skoðun, en það krefst hreinskilni. Það sem stendur eftir hér er ekki ný stefna, heldur gamalt stefnumál í nýjum búningi og með nýjan talsmann sem áður talaði með allt öðrum hætti. Þegar þessi mál voru til umræðu fyrir ári gagnrýndi dómsmálaráðherra áherslu á skilvirkni og stjórnsýslu – og spurði hvar væru mannúðlegu úrræðin. Hún lét ekki orðin nægja heldur ýmist sat hún hjá eða greiddi atkvæði gegn málunum á þinginu. Nú talar hún hins vegar fyrir sömu lagabreytingum, sömu úrræðum og sama verklagi – nema hvað nú heitir það „ný nálgun“. Það er velkomið að ráðherra hafi skipt um skoðun. Það er meira að segja þroskamerki að gera það. En hún verður þá líka að viðurkenna það. Það gengur ekki upp að vera andstæðingur sömu stefnu sem maður reynir að eigna sér þegar svo hentar. Við í Sjálfstæðisflokknum höfum talað fyrir ábyrgri og skýrri landamæra- og útlendingastefnu. Við höfum sagt að vernda beri þá sem verndar þurfa – en jafnframt að ríkisvaldið verði að bregðast við þegar kerfið stendur ekki undir eigin tilgangi. Nú virðist dómsmálaráðherra hafa tekið undir þau sjónarmið. Það er vel. Hún er velkomin í raunveruleikann. Guðrún Hafsteinsdóttir formaður Sjálfstæðisflokksins
