Bæjarþing - Hvert er næsta mál? Málefnaþing Sjálfstæðisflokksins á Akureyri.
Velkomin
Sjálfstæðisflokkurinn á Akureyri
Fréttir og greinar
Björn Dagbjartsson, fyrrum alþingismaður Sjálfstæðisflokksins í Norðurlandskjördæmi eystra, sendiherra og framkvæmdastjóri Þróunarsamvinnustofnunar Íslands, lést á Landsspítalanum í dag, 11. desember, 88 ára að aldri. Björn fæddist 19. janúar 1937 í Álftagerði í Mývatnssveit, elstur sex barna hjónanna Dagbjarts Sigurðssonar og Kristjönu Ásbjörnsdóttur. Hann lauk stúdentsprófi frá Menntaskólanum á Akureyri 1959 og prófi í efnaverkfræði frá Technische Hochschule í Stuttgart 1964 og síðan doktorsprófi í matvælaverkfræði frá Rutgers University í New Jersey 1972. Hann starfaði sem verkfræðingur hjá Fiskimjölsverksmiðjunni í Vestmannaeyjum 1965–1966. Árin 1966–1969 og 1972–1974 starfaði hann sem sérfræðingur hjá Rannsóknastofnun fiskiðnaðarins og var þar forstjóri 1974–1984. Þá var hann aðstoðarmaður sjávarútvegsráðherra 1979–1980 og ritaði margar greinar um fiskiðnað í innlend og erlend tímarit og bækur. Björn var valinn Penni ársins af ritstjórn Dagblaðsins Vísis árið 1982 fyrir stuttar, skýrar og skilmerkilegar greinar um þjóðmál. Björn var varaþingmaður Sjálfstæðisflokksins í Norðurlandskjördæmi eystra 1979-1984 og alþingismaður 1984–1987 eftir að Lárus Jónsson hætti þátttöku í stjórnmálum. Litlu munaði að Björn næði kjöri í kosningunum 1987 en tilkoma Borgaraflokksins, sérframboðs Alberts Guðmundssonar, setti þar strik í reikninginn. Björn var framkvæmdastjóri Þróunarsamvinnustofnunar Íslands 1987–2001 og sinnti brautryðjendastarfi við uppbyggingu þróunarsamstarfs Íslands og landanna sunnan Sahara. Frá 2001 til 2005 var hann sendiherra Íslands í Mósambík, Suður-Afríku og Namibíu. Var hann fyrsti sendiherra Íslands, búsettur í Afríku. Björn var virkur í starfi Rótarýhreyfingarinnar á Íslandi um áratugaskeið og kom ásamt Gunnhildi Sigurðardóttur á samstarfi milli Rótarýklúbba á Íslandi og í Kimberley í Suður-Afríku um byggingu og rekstur barnaheimilis í einu af fátækustu hverfum borgarinnar. Eiginkona Björns var Sigrún Valdimarsdóttir, bankastarfsmaður og leiðsögumaður, fædd 9. janúar 1936, en hún lést 6. maí 2001. Sambýliskona Björns var Sigríður Jóhannesdóttir bankastarfsmaður, fædd 8. júní 1939, en hún lést 18. september 2005. Eftirlifandi sambýliskona Björns er Gunnhildur Sigurðardóttir hjúkrunarfræðingur en einnig lætur Björn eftir sig dæturnar Sigurveigu Huld Sigurðardóttur og Brynhildi Björnsdóttur, fimm barnabörn og sjö barnabarnabörn. ---- Sjálfstæðismenn í Norðausturkjördæmi minnast Björns Dagbjartssonar með hlýju og virðingu. Hann sat vissulega stutta stund á þingi en var farsæll þingmaður sem vann vel fyrir umbjóðendur sína, Eyfirðinga og Þingeyinga - öflugur í ræðu og riti í pólitísku starfi. Björn sýndi og sannaði styrk sinn eftir þingferilinn með því að leiða farsælt alþjóðastarf á fjarlægri grundu á mikilvægu skeiði, öflugur fulltrúi lítillar þjóðar á stóru mikilvægu svæði um langt árabil. Við færum fjölskyldu Björns innilegar samúðarkveðjur að leiðarlokum. Blessuð sé minning hans. Stefán Friðrik Stefánsson ritstjóri Íslendings, vefrits sjálfstæðisfélaganna á Akureyri
Fulltrúaráð sjálfstæðisfélaganna á Akureyri samþykkti á fundi sínum í kvöld tillögu stjórnar um að röðun fari fram við val á fjórum efstu sætum framboðslista við sveitarstjórnarkosningar vorið 2026. Að lokinni röðun mun kjörnefnd leggja fram tillögu að fullskipuðum framboðslista. Tillagan var samþykkt með auknum meirihluta, tveimur þriðju atkvæða, í samræmi við reglur Sjálfstæðisflokksins. Fulltrúaráðið samþykkti að auki tillögu um að tvöfalt fulltrúaráð, aðal- og varamenn, komi saman við valið og það fari fram eigi síðar en laugardaginn 7. febrúar nk. Kjörnefnd tekur ákvörðun um dagsetningu röðunar innan þess tímaramma. Á fundinum var kjörnefnd til að sjá um ferlið fram að afgreiðslu framboðslista kjörin. Í henni eiga sæti níu fulltrúar - fjórir frá fulltrúaráði og einn frá hverju sjálfstæðisfélagi. Fulltrúaráð Aðalmenn: Heiðrún Ósk Ólafsdóttir, Jósavin Arason, Karl Guðmundsson, María H. Marinósdóttir Varamenn: Atli Þór Ragnarsson, Jóhann Gunnar Kristjánsson Málfundafélagið Sleipnir Aðalmaður: Stefán Friðrik Stefánsson – Varamaður: Harpa Halldórsdóttir Sjálfstæðisfélag Akureyrar Aðalmaður: Þorvaldur Lúðvík Sigurjónsson – Varamaður: Daníel Sigurður Eðvaldsson Vörður, félag ungra sjálfstæðismanna á Akureyri Aðalmaður: Hafþór Hermannsson – Varamaður: Gunnlaugur Geir Gestsson Vörn, félag sjálfstæðiskvenna á Akureyri Aðalmaður: Gerður Ringsted – Varamaður: Aðalheiður Steina Guðmundsdóttir Sjálfstæðisfélag Hríseyjar Aðalmaður: Valdemar Karl Kristinsson – Varamaður: Kristinn Frímann Árnason
Bæjarmálafundur Sjálfstæðisflokksins á Akureyri verður haldinn í Geislagötu 5 mánudaginn 1. desember kl. 17:30. Farið yfir breytingar á fjárhagsáætlun Akureyrarbæjar 2026-2029 (seinni umræða fer nú fram í bæjarstjórn) og áherslur í fræðslu- og lýðheilsuráði á kjörtímabilinu. Fundarstjóri: Heimir Örn Árnason, formaður bæjarráðs og oddviti Sjálfstæðisflokksins á Akureyri Allir velkomnir - heitt á könnunni.
Öflugt millilandaflug til Akureyrar er ekki gæluverkefni heldur drifkraftur sem skapar tækifæri og beinan efnahagslegan, samfélagslegan og umhverfislegan ávinning fyrir landið allt. Flug sem skapar verðmæti Ef Ísland ætlar að byggja upp fjölbreyttara, sjálfbærara og sterkara efnahagslíf, þarf landið að nýta alla sína styrkleika. Norðurland sem atvinnusvæði hefur verið í sókn. Millilandaflug um Akureyri er eitt þeirra verkefna sem getur stutt við hana, umbreytt ferðamennsku, atvinnulífi og byggð í senn – og styrkt stöðu Íslands á alþjóðavettvangi. Það er hlutverk sem þjónar ekki aðeins Norðurlandi – heldur Íslandi öllu. Nýleg skýrsla Rannsóknamiðstöðvar ferðamála sýnir að beint millilandaflug til Akureyrar stuðlar nú þegar að betri dreifingu ferðamanna um landið og styrkir ferðaþjónustu utan suðvesturhornsins. Þetta staðfestir reynslan af vetrarflugi easyJet 2023–2024, en ferðafólk sem nýtti sér þá flugið eyddi um 1,2 milljörðum króna á svæðinu – á rólegasta tíma ársins. Áhrifin ná líka langt út fyrir ferðaþjónustuna. Flugið skapaði tugi milljóna í skatttekjur til sveitarfélaga og ríkissjóðs og stuðlaði að auknum stöðugleika í atvinnulífi á Norðurlandi. Akureyri tengir Ísland betur við umheiminn Góðar tengingar við umheiminn eru auk þess forsenda að svæði séu samkeppnishæf um uppbyggingu og mannauð. Beinar flugtengingar laða að erlenda fjárfestingu, ný störf og hátækniverkefni – ekki síst þar sem þörf er á erlendum sérfræðingum og greiðu aðgengi að alþjóðamörkuðum. Millilandaflugið er því ekki aðeins mikilvægt fyrir ferðaþjónustu á öllu norðanverðu landinu, heldur sömuleiðis fyrir orkuiðnað, sjávarútveg, nýsköpun og menntun svo nokkuð sé nefnt. Með öflugum tengingum eykst bæði byggðafesta og möguleikar atvinnulífsins að norðan – og um leið styrkist íslenskt efnahagslíf í heild. Ég ætla því að leyfa mér að fullyrða að með eflingu millilandaflugs um Akureyrarflugvöll eykst samkeppnishæfni Íslands í heild. Tími til að hugsa stórt Haustþing Samtaka sveitarfélaga og atvinnuþróunar á Norðurlandi eystra (SSNE), sem haldið var í október síðastliðnum, hvatti í ályktun sinni stjórnvöld til að efla flugþróunarsjóð, styrkja innviði Akureyrarflugvallar og setja á fót sérstaka stjórn fyrir flugvöllinn. Slík stjórn gæti mótað framtíðarstefnu, tryggt samkeppnishæfni, samhæft uppbyggingu og haft leiðandi hlutverk í markaðssetningu flugsins í samstarfi við Markaðsstofu Norðurlands og Íslandsstofu. Tryggt millilandaflug er ekki kostnaður heldur fjárfesting í uppbyggingu, samkeppnishæfni og fleiri tækifærum. Til þess þarf fyrirsjáanleika og sameiginlegan vilja. Það er kominn tími til að líta á Akureyri sem það sem hún í raun er – aðra gátt inn í landið. Lára Halldóra Eiríksdóttir formaður stjórnar SSNE og bæjarfulltrúi Sjálfstæðisflokksins á Akureyri
