Baldvin Valdemarsson (3. sæti)

Baldvin Valdemarsson, bæjarfulltrúi, gefur kost á sér í 3. sæti í röðun Sjálfstæðisflokksins á Akureyri 3. febrúar nk.

Baldvin er 59 ára Akureyringur, viðskiptafræðingur frá Háskóla Íslands. Baldvin starfar sem verkefnastjóri hjá Atvinnuþróunarfélagi Eyjafjarðar. Hann hefur fjölþætta, áratuga reynslu sem atvinnustjórnandi og við eigin atvinnurekstur. Starfsvettvangur hans hefur verið við sjávaútveg, drykkja- og matvælaframleiðslu og verslunarrekstur.

Fyrir háskólanám var Baldvin sjómaður, verkamaður og skrifstofumaður í Grindavík, Dalvík og á Akureyri, ásamt því að stunda nám í útgerðartækni við Tækniskóla Íslands. Hann lauk svo kandídatsprófi í viðskiptafræðum frá Háskóla Ísland 1988, af framleiðslu- og stjórnunarsviði.

Baldvin hefur verið virkur í innra starfi Sjálfstæðisflokksins, meðal annars verið formaður fulltrúaráðs sjálfstæðisfélaganna á Akureyri og gegnt trúnaðarstörfum fyrir Akureyrarbæ.

Baldvin hefur verið fulltrúi í húsnæðisnefnd Akureyrar og félagsmálaráði, þar sem hann kynntist og vann með helstu málaflokka sveitarfélagsins á sviði velferðar- og félagsmála og rekstur helstu stofnana þeim tengd.

Meðal annars málefni fatlaðra á Eyjafjarðarsvæðinu og starfsemi Öldrunarheimila Akureyrarbæjar og sat í stýrihóp verkefnisins „Akureyri í öndvegi“. Á síðasta kjörtímabili var hann í kjörstjórn Akureyrar. Á þessu kjörtímabilil hefur hann verið varabæjarfulltrúi, bæjarfulltrúi og stjórnarmaður í Hafnarsamlagi Norðurlands.