Eva Hrund Einarsdóttir (2. sæti)

Eva Hrund Einarsdóttir, bæjarfulltrúi, gefur kost á sér í 2. sæti í röðun Sjálfstæðisflokksins á Akureyri 3. febrúar nk. 

Eva Hrund er fædd 26. febrúar 1977 og er uppalin Akureyringur. Hún útskrifaðist úr Menntaskólanum á Akureyri 1999 og úr Háskólanum á Akureyri 2003 sem viðskiptafræðingur. Í dag starfar hún sem fjármála- og starfsmannastjóri hjá Lostæti ehf en þar áður sem ráðgjafi hjá Capacent og sem stundakennari í Háskólanum á Akureyri. Eva hefur setið í bæjarstjórn frá 2014 og setið í stjórn Akureyrarstofu og um tíma í skólanefnd.

Eva Hrund hefur verið virk í félagsmálum. Hún sat í stjórn Landsbankans eftir hrun árin 2008-2010, fyrst sem varamaður og síðar sem aðalmaður. Eva Hrund starfaði einnig sem formaður Góðvina Háskólans á Akureyri um tíma. Í samvinnu við Sjálfstæðisflokkinn hélt hún leiðtoganámskeið fyrir 500 konur á Akureyri árið 2007 og var fengin til Vestmannaeyja að halda sambærilegt námskeið ári síðar. Eva Hrund er einn stofnenda félagsskapsins EXEDRA sem er vettvangur umræðna fyrir fjölbreyttan hóp kvenna úr fremstu röð atvinnulífs, stjórnmála og fjölmiðla. Hún starfaði sem framkvæmdastjóri EXEDRA frá 2006-2013.

Eva Hrund er gift Árna Kár Torfasyni og á tvær dætur, þær Hildi Sigríði 12 ára og Katrínu Lilju 8 ára.

„Þetta snýst allt um að auka lífsgæði bæjarbúa. Í störfum mínum sem bæjarfulltrúi hef ég kappkostað við að láta verkin tala og lagt mig fram við að ná fram þeim stefnumálum sem við Sjálfstæðismenn lögðum upp með. Ég hef lagt áherslu á góð samskipti og jákvæðni þar sem ég tel það ríkast til árangurs. Sjálfstæðisflokkurinn hefur allt að vinna hér á Akureyri og með sameiginlegu átaki tel ég okkur hafa alla burði til þess að verða leiðandi afl á komandi kjörtímabili.

Það eru fjölmörg verkefni sem liggja fyrir komandi bæjarstjórn sem endranær en það sem er þörf á að leggja áherslu á er vel ígrunduð langtímasýn og verkáætlun sem er fylgt eftir með markvissum hætti, skilvirk og gagnsæ fjármálaáætlanagerð, rafræn stjórnsýsla, endurskoðun á skólakerfinu með áherslu á nútímavæðingu, öldrunarmál og málefni ungs fólks og þá ekki síst ungs fólks í vanda. Helstu baráttumál munu áfram vera efling samgangna og þá sérstaklega flugsamgangna, raforkuflutningur og réttlát skipting á fjármagni milli ríkis og sveitarfélaga.

Akureyri er öflugt bæjarfélag og hefur alla burði til að dafna enn frekar og er ég tilbúin að leggja fram krafta mína til þess að stuðla að því.“

Nefndar og stjórnarseta á vegum Akureyrarbæjar:

• Stjórnarmaður í Landshlutasamtökunum Eyþingi frá 2014

• Nefndarmaður í stjórn Akureyrarstofu frá 2014

• Nefndarmaður í fræðsluráði 2014 - 2015

• Varamaður í bæjarráði frá 2014

• Formaður úthlutunarnefndar Eyþings frá 2015

• Varamaður í stjórn Norðurorku frá 2014

• Varamaður í stjórn Lífeyrissjóðs starfsmanna Akureyrarbæjar frá 2014

• Stjórnarmaður í Sinfóníuhljómsveit Norðurlands frá 2014

• Nefndarmaður í stjórn fasteigna og framkvæmdaráði Akureyrarbæjar 2008 - 2009