Sigurjón Jóhannesson (3. sæti)

Sigurjón Jóhannesson, sviðsstjóri og varabæjarfulltrúi, gefur kost á sér í 3. sæti í röðun Sjálfstæðisflokksins á Akureyri 3. febrúar nk.

Sigurjón fæddist 23. júní 1966 í Reykjavík, en ólst upp á Patreksfirði og bjó á námsárum í Stykkishólmi og Reykjavík. Sigurjón lauk stúdentsprófi frá Menntaskólanum á Ísafirði 1986 og prófi í rafmagnsverkfræði frá Háskóla Íslands 1991. 

Sigurjón hefur búið og starfað á Akureyri frá árinu 1991, að undanskilinni námsdvöl í Freiburg í Þýskalandi veturinn 2006-2007. Sigurjón var umdæmisverkfræðingur Pósts og síma á Norðurlandi á árunum 1991-1996 og síðan svæðisstjóri á aðgangsneti Símans á Norður- og Austurlandi til 2006. Frá árinu 2007 hefur Sigurjón starfað hjá verkfræðistofunni Raftákni á Akureyri.

Sigurjón var á námsárum sínum í Reykjavík í stjórn Vöku, félags lýðræðissinnaðra stúdenta og í stúdentaráði Háskóla Íslands, fyrst sem varamaður og síðan aðalmaður. Sigurjón hefur setið í stjórn Norðurlandsdeildar Verkfræðingafélags Íslands, m.a. sem formaður, foreldraráði Oddeyrarskóla og stjórn körfuknattleiksdeildar Þórs.

Sigurjón hefur verið varabæjarfulltrúi Sjálfstæðisflokksins á Akureyri og setið í skipulagsráði frá árinu 2014, en hafði áður setið í heilbrigðisnefnd Norðurlands eystra. Sigurjón var gjaldkeri fulltrúaráðs sjálfstæðisfélaganna á Akureyri 2013-2017 og varaformaður Sjálfstæðisfélags Akureyrar 2013-2014.

Sigurjón er kvæntur Guðnýju Þ. Kristmannsdóttur, listmálara, og eiga þau soninn Jóhannes Ágúst.