Velkomin

Málfundafélagið Sleipnir heldur laugardagsfund í Geislagötu 5 (gengið inn að norðan) laugardaginn 14. nóvember kl. 10:00. Jón Gunnarsson, alþingismaður og fyrrum dómsmálaráðherra, flytur framsögu og svarar fyrirspurnum. Rætt almennt um stöðuna í pólitíkinni og málefni landsbyggðarinnar. Fundarstjóri: Stefán Friðrik Stefánsson, formaður Sleipnis. Heitt á könnunni - allir velkomnir.

Ég verð að segja það upphátt hversu mikið ég hefði óskað mér að Icelandair hefði verið að tilkynna okkur Norðlendingum og Austfirðingum að flugfélagið hygðist hefja flug frá Akureyrarflugvelli til Kaupmannahafnar frekar en Tenerife og þá tvisvar í viku. Það hefði haft miklu meiri áhrif í þá veru að styrkja byggðina fyrir norðan og austan. Beint áætlunarflug milli Akureyrar og Kaupmannahafnar á sér lengri sögu en margir gera sér grein fyrir. Air Greenland hóf flug á leiðinni vorið 2003 og flaug tvisvar í viku fram í desember, um átta mánaða skeið. Iceland Express tók síðan upp beint sumarflug árið 2006 og flaug á leiðinni í nokkur sumur, síðast árið 2012. Tíu árum síðar, 2. júní 2022, fór Niceair í sitt fyrsta flug frá Akureyri. Áfangastaðurinn var Kaupmannahöfn. Þar var komið flugfélag með heimahöfn á Akureyri og metnað til að halda úti millilandaflugi árið um kring. Félagið flaug til Kaupmannahafnar þar til það stöðvaði starfsemi sína í apríl 2023. Allt þetta flug gekk ljómandi vel og sætanýting góð. Air Greenland flugið féll niður vegna óánægja með íbúa á Grænlandi með að flugfarið var lægra frá Akureyri til Kaupmannahafnar. Málið varð að pólitísku hitamáli á Grænlandi. Heimastjórnin skipti um tvo stjórnarmenn í stjórn Air Greenland. Í framhaldinu felldi stjórnin niður flugið með fjórum atkvæðum gegn þremur í nóvember 2003, fluginu var hætt nokkrum vikum síðar í desember það ár. Forstjórinn Air Greenland og allir fjórir framkvæmdastjórar félagsins vildu halda fluginu áfram, þrátt fyrir það var ákvörðun stjórnarinnar að fella flugleiðina á milli Akureyrar og Kaupmannahafnar niður. Iceland Express flaug yfir sumarið á árunum 2006 - 2012 á milli Akureyrar og Kaupmannahafnar og gekk það flug vel og nýtingin góð. Við þekkjum það líka að sætanýting Niceair frá Akureyri til Kaupmannahafnar var líka mjög góð. Ég hef lengi talað (skrifað) fyrir því að byggja upp alþjóðaflugvellina á landsbyggðinni upp þannig að hægt væri að nýta þá til millilandaflugs. Sú uppbygging hefur gengið með ágætum á undanförnum árum þó ýmislegt megi telja til sem vinna þarf í til að styrkja millilandaflugið um alþjóðlegu flugvellina tvo í Norðausturkjördæmi. Það hefur lengi verið mín skoðun að flug til Kaupmannahafnar hefði gríðarlega mikið að segja fyrir íbúa á Norður- og Austurlandi. Fyrir ferðaþjónustuna myndi slíkt flug einnig skipta gríðarlega miklu máli. Slíkt flug gæti verið hlut af ‘‘Stop Over“ markaðskerfi Icelandair sem myndi skapa mikil tækifæri í markaðssetningu, myndi styðja uppbyggingu heilsárs ferðaþjónustu um allt land. Við eigum að halda áfram að vinna að því að koma á reglulegu flugi milli Akureyrar og Kaupmannahafnar á ný. Þar höfum við mikla reynslu til að byggja á. Það hefur verið kallað eftir því um langt árabil að Icelandair flygi á milli Akureyrar og Kaupmannahafnar. Það myndi styrkja byggðina á Norður- og Austurlandi mikið. Það hefði líka mikið að segja um það mikla og stóra verkefni sem er að byggja upp heilsársferðaþjónustu á því landsvæði sem stendur fjærst Keflavíkurflugvelli. Allt Ísland - allt árið.

Þegar Sjálfstæðisflokkur, L-listi og Framsókn mynduðu meirihluta í bæjarstjórn Akureyrarbæjar í vor settum við málefnasamningi okkar yfirskriftina Framtíð, atvinna og velferð. Það voru ekki orð valin af handahófi. Þau lýsa því samfélagi sem við viljum byggja upp á Akureyri og þeirri forgangsröðun sem við viljum sjá í rekstri bæjarins næstu árin. Fjárhags- og framkvæmdaáætlun 2027-2030, sem lögð var fram í bæjarstjórn til fyrstu umræðu á þriðjudag, er fyrsta heildstæða áætlun þessa meirihluta og þar taka þessar áherslur á sig mjög skýra mynd. Við stöndum á traustum grunni. Árið 2027 er gert ráð fyrir að tekjur samstæðunnar verði um 44 milljarðar króna og rekstrarniðurstaða jákvæð um tæplega 1,55 milljarða. Veltufé frá rekstri verður um 5,8 milljarðar. Skuldaviðmið samstæðunnar verður 95,8% og lækkar samkvæmt áætlun í 88,4% árið 2030 sem er vel undir 150% hámarksviðmiði sveitarstjórnarlaga. Sterkari staða má þó ekki verða ávísun á minna aðhald. Þvert á móti. A-hluti bæjarins stefnir í 413 milljóna króna afgang árið 2027 en halli á aðalsjóði sýnir að áfram þarf að vinna að umbótum í rekstrinum. Þess vegna erum við að hefja stjórnsýsluúttekt þar sem skipulag, verkaskipting og nýting fjármuna verða skoðuð með það að markmiði að bæta rekstur og þjónustu. Í þeirri vinnu munu raddir starfsmanna sveitarfélagsins og íbúanna skipta miklu máli. Ábyrgur rekstur snýst að sjálfsögðu líka um að gæta að fjárhagslegri stöðu heimilanna og því efnahagsumhverfi sem fólk býr við. Almennar gjaldskrárhækkanir verða að hámarki 2,5% og gjaldskrár sem hafa bein áhrif á barnafjölskyldur verða að mestu óbreyttar. Fasteignaskattur á íbúðarhúsnæði verður áfram 0,28%, eftir að hafa verið lækkaður úr 0,31% á þessu ári. Jafnframt verður lögð fram tillaga á milli umræðna um að lækka álagningarhlutfall atvinnuhúsnæðis úr 1,61% í 1,59%. Þetta eru pólitískar ákvarðanir. Við teljum ekki rétt að mæta hverri kostnaðarhækkun með því að senda einfaldlega hærri reikning til heimilanna og fyrirtækjanna. Sveitarfélagið þarf líka að gera kröfur til sjálfs sín um ábyrgð og aðhald. Framkvæmdir fyrir hátt í 23 milljarða Við ætlum að halda áfram að byggja upp. Á tímabilinu 2027-2030 er ráðgert að fjárfesta fyrir um 22,7 milljarða króna í A- og B-hluta. Þetta er mikil fjárfesting en hún endurspeglar líka þá einföldu staðreynd að Akureyri er samfélag í vexti og við ætlum að vera tilbúin fyrir þann vöxt. Mesta ábyrgð ber sveitarfélagið gagnvart fólkinu sem hér býr. Tveir þriðju hlutar útgjalda aðalsjóðs fara til fræðslu og velferðar. Um 14,8 milljarðar fara til fræðslu- og uppeldismála og 7,9 milljarðar til velferðarmála. Þá fara 3,8 milljarðar til æskulýðs- og íþróttamála og 1,4 milljarðar til menningarmála. Á næstu árum verður haldið áfram uppbyggingu skólahúsnæðis, meðal annars með framkvæmdum í Síðuskóla og við Giljaskóla. Uppbygging íþróttamannvirkja heldur áfram hjá KA og Þór, ráðist verður í endurbætur á gervigrasi í Boganum og Glerárlaug og undirbúningur er þegar hafinn að fjölnota íþróttahúsi Þórs. Samkvæmt framkvæmdaáætlun fara um 4,4 milljarðar til æskulýðs- og íþróttamála á tímabilinu. Vöxtur sveitarfélagsins Við ætlum líka að undirbúa bæinn fyrir áframhaldandi fjölgun íbúa. Fjárfest verður í nýjum hverfum en um leið í endurnýjun eldri hverfa, umferðaröryggi og stígakerfi. Móahverfi og Holtahverfi eru stór verkefni, Oddeyrin verður áfram endurnýjuð og samtals fara um 3,3 milljarðar í uppbyggingu nýrra hverfa á tímabilinu. Vöxtur Akureyrarbæjar verður að vera öllum til heilla. Þess vegna fjárfestum við áfram í félagslegu húsnæði og styðjum við uppbyggingu almennra leiguíbúða. Við vinnum að nýju húsnæði fyrir Brekkukot og undirbúum viðbyggingu við Skógarlund. Og við horfum lengra fram á veginn. Uppbygging á Dysnesi, fjárfestingar í veituinnviðum og markviss sókn í fleiri atvinnulóðir, nýsköpun og orku- og gagnatengda starfsemi eiga að styrkja atvinnulífið og fjölga tækifærum til verðmætasköpunar. Ábyrg fjármálastjórn Þetta er í mínum huga kjarninn í fjárhagsáætluninni. Við ætlum að sýna ábyrgð í rekstri án þess að hætta að sækja fram. Við ætlum að hlífa heimilunum eins og kostur er, bæta þjónustuna og fjárfesta af krafti í framtíðinni. Akureyrarbær á að vera bær sem vex, bær sem þorir að sækja fram og bær þar sem gott er að búa og starfa. Framtíð, atvinna og velferð eru ekki innantóm slagorð. Þau eiga og munu sjást í verki hjá nýrri bæjarstjórn Akureyrarbæjar. Berglind Ósk Guðmundsdóttir bæjarstjóri á Akureyri