Velkomin

Þegar Sjálfstæðisflokkur, L-listi og Framsókn mynduðu meirihluta í bæjarstjórn Akureyrarbæjar í vor settum við málefnasamningi okkar yfirskriftina Framtíð, atvinna og velferð. Það voru ekki orð valin af handahófi. Þau lýsa því samfélagi sem við viljum byggja upp á Akureyri og þeirri forgangsröðun sem við viljum sjá í rekstri bæjarins næstu árin. Fjárhags- og framkvæmdaáætlun 2027-2030, sem lögð var fram í bæjarstjórn til fyrstu umræðu á þriðjudag, er fyrsta heildstæða áætlun þessa meirihluta og þar taka þessar áherslur á sig mjög skýra mynd. Við stöndum á traustum grunni. Árið 2027 er gert ráð fyrir að tekjur samstæðunnar verði um 44 milljarðar króna og rekstrarniðurstaða jákvæð um tæplega 1,55 milljarða. Veltufé frá rekstri verður um 5,8 milljarðar. Skuldaviðmið samstæðunnar verður 95,8% og lækkar samkvæmt áætlun í 88,4% árið 2030 sem er vel undir 150% hámarksviðmiði sveitarstjórnarlaga. Sterkari staða má þó ekki verða ávísun á minna aðhald. Þvert á móti. A-hluti bæjarins stefnir í 413 milljóna króna afgang árið 2027 en halli á aðalsjóði sýnir að áfram þarf að vinna að umbótum í rekstrinum. Þess vegna erum við að hefja stjórnsýsluúttekt þar sem skipulag, verkaskipting og nýting fjármuna verða skoðuð með það að markmiði að bæta rekstur og þjónustu. Í þeirri vinnu munu raddir starfsmanna sveitarfélagsins og íbúanna skipta miklu máli. Ábyrgur rekstur snýst að sjálfsögðu líka um að gæta að fjárhagslegri stöðu heimilanna og því efnahagsumhverfi sem fólk býr við. Almennar gjaldskrárhækkanir verða að hámarki 2,5% og gjaldskrár sem hafa bein áhrif á barnafjölskyldur verða að mestu óbreyttar. Fasteignaskattur á íbúðarhúsnæði verður áfram 0,28%, eftir að hafa verið lækkaður úr 0,31% á þessu ári. Jafnframt verður lögð fram tillaga á milli umræðna um að lækka álagningarhlutfall atvinnuhúsnæðis úr 1,61% í 1,59%. Þetta eru pólitískar ákvarðanir. Við teljum ekki rétt að mæta hverri kostnaðarhækkun með því að senda einfaldlega hærri reikning til heimilanna og fyrirtækjanna. Sveitarfélagið þarf líka að gera kröfur til sjálfs sín um ábyrgð og aðhald. Framkvæmdir fyrir hátt í 23 milljarða Við ætlum að halda áfram að byggja upp. Á tímabilinu 2027-2030 er ráðgert að fjárfesta fyrir um 22,7 milljarða króna í A- og B-hluta. Þetta er mikil fjárfesting en hún endurspeglar líka þá einföldu staðreynd að Akureyri er samfélag í vexti og við ætlum að vera tilbúin fyrir þann vöxt. Mesta ábyrgð ber sveitarfélagið gagnvart fólkinu sem hér býr. Tveir þriðju hlutar útgjalda aðalsjóðs fara til fræðslu og velferðar. Um 14,8 milljarðar fara til fræðslu- og uppeldismála og 7,9 milljarðar til velferðarmála. Þá fara 3,8 milljarðar til æskulýðs- og íþróttamála og 1,4 milljarðar til menningarmála. Á næstu árum verður haldið áfram uppbyggingu skólahúsnæðis, meðal annars með framkvæmdum í Síðuskóla og við Giljaskóla. Uppbygging íþróttamannvirkja heldur áfram hjá KA og Þór, ráðist verður í endurbætur á gervigrasi í Boganum og Glerárlaug og undirbúningur er þegar hafinn að fjölnota íþróttahúsi Þórs. Samkvæmt framkvæmdaáætlun fara um 4,4 milljarðar til æskulýðs- og íþróttamála á tímabilinu. Vöxtur sveitarfélagsins Við ætlum líka að undirbúa bæinn fyrir áframhaldandi fjölgun íbúa. Fjárfest verður í nýjum hverfum en um leið í endurnýjun eldri hverfa, umferðaröryggi og stígakerfi. Móahverfi og Holtahverfi eru stór verkefni, Oddeyrin verður áfram endurnýjuð og samtals fara um 3,3 milljarðar í uppbyggingu nýrra hverfa á tímabilinu. Vöxtur Akureyrarbæjar verður að vera öllum til heilla. Þess vegna fjárfestum við áfram í félagslegu húsnæði og styðjum við uppbyggingu almennra leiguíbúða. Við vinnum að nýju húsnæði fyrir Brekkukot og undirbúum viðbyggingu við Skógarlund. Og við horfum lengra fram á veginn. Uppbygging á Dysnesi, fjárfestingar í veituinnviðum og markviss sókn í fleiri atvinnulóðir, nýsköpun og orku- og gagnatengda starfsemi eiga að styrkja atvinnulífið og fjölga tækifærum til verðmætasköpunar. Ábyrg fjármálastjórn Þetta er í mínum huga kjarninn í fjárhagsáætluninni. Við ætlum að sýna ábyrgð í rekstri án þess að hætta að sækja fram. Við ætlum að hlífa heimilunum eins og kostur er, bæta þjónustuna og fjárfesta af krafti í framtíðinni. Akureyrarbær á að vera bær sem vex, bær sem þorir að sækja fram og bær þar sem gott er að búa og starfa. Framtíð, atvinna og velferð eru ekki innantóm slagorð. Þau eiga og munu sjást í verki hjá nýrri bæjarstjórn Akureyrarbæjar. Berglind Ósk Guðmundsdóttir bæjarstjóri á Akureyri

Laugardagsfundur með Ármanni Atla Eiríkssyni, eiganda og framkvæmdastjóra Kaffistofunnar, verður haldinn í Geislagötu 5 (gengið inn að norðan) laugardaginn 7. nóvember kl. 10:00. Ármann Atli fer yfir hans bakgrunn, hvernig þetta fyrirtæki byrjaði, hvernig það hefur þróast og kynnir fyrir okkur hvaða einstaka kaffi hann er að bjóða uppá. Kaffistofan byrjaði undir merkjum Kaffipressunnar sem kaffivagn hjá KA heimilinu árið 2020. Það var svo 4 árum seinna sem kaffihús í Brekkugötu 5 opnaði sem og Kaffipressan tók yfir rekstur Kaffistofunnar og sameinaðist reksturinn undir einu nafni, Kaffistofan. Í dag er Kaffistofan eina sérkaffibrennslan á Akureyri og rekur heildstætt kerfi þar sem kaffihús, brennsla og netverslun vinna saman sem ein heild. Markmiðið er enn það sama og í upphafi: Að litlir hlutir skipti máli og að gott kaffi verði til með stöðugleika, ferlum og natni. Allir velkomnir - heitt á könnunni, ferskt og gott kaffi frá Kaffistofunni að sjálfsögðu!

Helgi Ólafsson, formaður Sjálfstæðisfélags Raufarhafnar, lést 27. október sl. 97 ára að aldri. Helgi var ötull og öflugur í félagsstarfi Sjálfstæðisflokksins um áratugaskeið í Norðurlandskjördæmi eystra og í hinu nýja Norðausturkjördæmi - traust fyrirmynd í því að vinna af krafti og aldur væri afstætt hugtak í elju og jákvæðu lífsformi. Helgi fæddist 31. maí 1929 á Raufarhöfn og ólst þar upp, aðeins örfáum dögum yngri en Sjálfstæðisflokkurinn sem stofnaður var 25. maí 1929 með samruna Íhaldsflokksins og Frjálslynda flokksins. Foreldrar Helga voru hjónin Ólafur Árni Ágústsson, f. 1903 á Ósi í Skilmannahreppi í Borgarfjarðarsýslu, d. 1982, verkstjóri, vélstjóri og hafnsögumaður á Raufarhöfn, og Sigríður Guðmundsdóttir, f. 1908, d. 1990, húsfreyja og verslunarkona á Raufarhöfn. Helgi gekk í barnaskóla og unglingaskóla Raufarhafnar og Iðnskóla Siglufjarðar, og var í sveit á Oddsstöðum á Melrakkasléttu. Hann öðlaðist meistararéttindi rafvirkja árið 1955 og starfaði við fag sitt vel fram á tíræðisaldur. Hann hlaut titilinn Iðnaðarmaður ársins 2020, kominn yfir nírætt og enn iðinn við fag sitt, sló hvergi af metnaði sínum og kröftum í rafiðn sinni. Helgi vann við vélgæslu í frystihúsinu Jökli á Raufarhöfn og vann síðan við vélgæslu og fleira hjá Rafveitu Raufarhafnar. Hann var slökkviliðsstjóri 1968-1994 og hlaut viðurkenningu fyrir störf sín frá Brunamálastofnun ríkisins. Helgi var í sveitarstjórn Raufarhafnar í 20 ár og var formaður Sjálfstæðisfélags Raufarhafnar til æviloka. Hann var fréttaritari Morgunblaðsins um árabil. Helgi var með hafnsögubát meðan faðir hans var hafnsögumaður á Raufarhöfn. Helgi starfaði í Lionsklúbbi Raufarhafnar og formaður Félags eldri borgara á Raufarhöfn um langt skeið, ötull og iðinn í því starfi sem og öðru. Eiginkona Helga er Stella Borgþóra Þorláksdóttir, f. 12. desember 1931 á Siglufirði, fyrrverandi skrifstofumaður og póstmeistari á Raufarhöfn. Foreldrar hennar voru Þorlákur Anton Þorkelsson, f. 1897, d. 1980, skipstjóri á Siglufirði, og Ásta Júlíusdóttir, f. 1900, d. 1970, framreiðslukona og húsmóðir á Siglufirði og í Reykjavík. Börn Helga og Stellu eru: Sigríður Kristín - f. 1948, Ólafur Helgi - f. 1949, Þorlákur Ástmar - f. 1959, Hannes - f. 1966, Júlíus - f. 1967, og Ásta - f. 1970. Helgi og Stella ólu einnig upp bróður Stellu, Róbert Þorláksson frá 11 ára aldri til fullorðinsára. Helgi og Stella eiga stóran hóp afkomenda eins og nærri má geta. Í viðtali við Helga í Morgunblaðinu þegar hann varð níræður í maí 2019 sagði hann: "Ég hef gaman af að leika mér með ljósmyndavél, stunda gæsaveiðar á haustin og rjúpnaveiðar á vetrum. Ég náði ekki mörgum síðasta vetur, sex rjúpur voru það. Ég er hættur að fara einsamall á veiðar og fer með syni mínum, Júlíusi.“ Helgi setti upp listaverk sitt, Drekann á hafnargarðinum við smábátahöfnina á Raufarhöfn og spúði hann á nokkurra sekúndna fresti. Í fyrrnefndu viðtali sagði Helgi: "Ég er núna að breyta um eldaðferð á drekanum, geri hana öruggari þannig að maður geti ráðið því hvenær hann spýr eldinum". Níræður tók Helgi enn að sér rafmagnsverkefni fyrir bæjarbúa í neyðartilvikum, eins og hann orðaði það, og sagðist tilbúinn að borga með sér til að hafa eitthvað að gera við að fara milli staða. Þegar Stella eiginkona Helga veiktist og varð að dvelja á sjúkrahúsi á Akureyri í rúman mánuð þegar þau stóðu á níræðu keyrði Helgi á milli Raufarhafnar og Akureyrar til að heimsækja hana. Í viðtalinu sagði hann: "Ég stoppa í tvo til þrjá daga á Akureyri en fer svo heim til að gera eitthvað í höndunum svo ég verði ekki vitlaus. Fyrir fjórum dögum hlóð ég upp vegg í bílskúrsdyrnar heima hjá mér, setti upp glugga og pússaði vegginn.“ Helgi tók nokkrum sinnum sæti á framboðslistum; hafði verið í sveitarstjórn á sínu svæði eins og fyrr segir. Þau hjón mættu jafnan á öll kjördæmisþing og hann lét sig ekki vanta á landsfundum framundir það síðasta. Í alþingiskosningunum 2009 skipaði Helgi heiðurssæti á framboðslista Sjálfstæðisflokksins í Norðausturkjördæmi. Í alþingiskosningunum 2021 skipaði Helgi, sem þá var 92 ára, 11. sætið, fyrir miðju listans sem öflugur fulltrúi eldri borgara. Þegar listinn var samþykktur á kjördæmisráðsfundi í Mývatnssveit í miðjum samkomutakmörkunum vakti verðskuldaða athygli að Helgi og Stella mættu á eigin bíl og létu sóttvarnartakmarkanir og fjarlægðir ekki stöðva sig, bæði svo ern og öflug - til í baráttuna. Í alþingiskosningunum 2024 skipaði Helgi svo að nýju heiðurssætið á listanum í Norðausturkjördæmi, 95 ára að aldri og elsti frambjóðandinn í þeim kosningum - ötull í flokksstarfinu allt til æviloka. ----- Sjálfstæðismenn í Norðausturkjördæmi minnast Helga Ólafssonar með hlýju og virðingu. Hann var einn af síðustu lykilmönnum gamla tímans í flokksstarfinu í Norðurlandskjördæmi eystra sem enn var með okkur af elju og krafti í Norðausturkjördæmi - setti mark sitt á viðburði og fundi með jákvæðni sinni, ljúfleika og hlýju. Maður margra árstíða, sagði skemmtilegar sögur frá fyrri tíð og setti sig óhikað í spor okkar yngri með því að sækjast eftir því að miðla reynslu sinni og lífsgleði til samferðamanna sinna í samfélagi sínu og í hópi sjálfstæðismanna á ólíkum aldri á kjördæmisþingum og landsfundum allt til æviloka. Minningin um mannkosti og iðjusemi Helga mun lifa áfram. Við vottum Stellu og fjölskyldunni allri innilega samúð á sorgarstundu. Blessuð sé minningin um heiðursmanninn Helga Ólafsson á Raufarhöfn. Stefán Friðrik Stefánsson ritstjóri Íslendings