Sjálfstæðisflokkurinn vill lækka skatta og létta byrði

Kjósendur standa frammi fyrir skýru vali þann 30. nóvember. Þeir geta valið vinstri öflin og forsjárflokkana alla eða kosið Sjálfstæðisflokkurinn fyrir aukið einstaklingsfrelsi, lægri skatta og léttari byrði.

Létta þarf undir með heimilum landsins. Það gerum við best með því að minnka báknið, draga úr völdum stjórnmálamanna á líf fólks, lægri sköttum og skilja þannig meira eftir í vösum fólks. Við eigum að hjálpa fólki að sjálfsbjörg og tryggja að þeir sem höllum fæti standa fái skjól og liðsinni, að enginn verði út undan.

Hvernig gerum við þetta? Sjálfstæðisflokkurinn hefur í kosningabaráttunni kynnt þætti varðandi skatta á komandi kjörtímabili:

• Létta undir með barnafólki - 150 þúsund króna árlegur skattaafsláttur með hverju barni undir þriggja ára.
• Afnema stimpilgjald á kaupum einstaklinga á íbúðarhúsnæði.
• Framlengja skattfrjálsa ráðstöfun séreignarsparnaðar inn á húsnæðislán og hækkum fjárhæðarmörk. Jafnframt ætti að leyfa foreldrum að færa allt að 2 milljónum króna af séreignarsparnaði inn á höfuðstól íbúðaláns eða séreignarsparnað barna skattfrjálst.
• Við eigum að helminga erfðafjárskatt og fjórfalda frítekjumarkið í 20 milljónir króna.
• Frítekjumark fjármagnstekna þarf að hækka í 500 þúsund krónur - hættum að skattleggja verðbólgu.
• Efsta þrep skattkerfisins miðist við tvöfaldar meðaltekjur.

En meginstefið er eftir sem áður að hver og einn njóti tækifæris til þess að dafna og blómstra í lífinu, og frjálst framtak og frjálsir einstaklingar efli þannig og styrki land og þjóð. Til þess þarf að halda sköttum og afskiptum ríkis af einstaklingum og fyrirtækjum hóflegum. Stefni viljinn þangað kýstu Sjálfstæðisflokkinn.

Jens Garðar Helgason
oddviti Sjálfstæðisflokksins í Norðausturkjördæmi