Ég heiti Þorsteinn Kristjánsson og er 27 ára Akureyringur með ættir að rekja til Dalvíkur. Ég sækist eftir 4. sæti á lista Sjálfstæðisflokksins í Norðausturkjördæmi.Ég er menntaður stjórnmálafræðingur frá Háskóla Íslands, með diplómagráðu í opinberri stjórnsýslu frá sama skóla og starfa sem sölumaður hjá Toyota á Akureyri ásamt því að reka nýsköpunarfyrirtækið Quality Console með félaga mínum sem snýr að gæðalausnum í sjávarútvegi.
Ég hef tekið virkan þátt í stjórnmálum undanfarin ár, m.a. setið í stjórn Varðar, félags ungra sjálfstæðismanna á Akureyri. Ég brenn fyrir aukinni atvinnuuppbyggingu í kjördæminu enda eru atvinnutækifæri í kjördæminu okkar af skornum skammti fyrir vel menntað ungt fólk.
Nú er tímabært að yngja kjósendahóp flokksins upp. Það gerum við m.a. með því að setja ungt fólk framarlega á lista. Hvernig væri að við myndum hleypa okkur að borðinu, gefa okkur tækifæri á því að taka þátt og móta þannig okkar eigin framtíð?